ICT 合格大作戰Lv 2

做多啲 paper 就會識？

對 0 分、冇興趣嘅學生：一開始唔會。

• 一份卷一要做 2 個鐘，大部分題目唔識，好快就會覺得挫敗，然後放棄。
• 對住答案背，換個講法就唔識。DSE 好少原題重出，但同一個概念年年都考：SSD 好處、DNS、IF 公式、迴圈追蹤。
• 歷屆試題係「題庫」，唔係「課本」。要先明白，做題先有用。
• 2012–2024 年嘅卷係舊課程。新課程由 2025 年開始，程式編寫佔分大增，郵件合併、簡報軟件等已經唔再考。舊卷可以做，但要揀返仍然考嘅課題。

正確次序：

1. 一分鐘明白：用生活比喻講一個概念，例如 RAM = 工作枱。
2. 即刻做：做 8–10 題同類題，題型跟足歷屆試題。
3. 睇點解：答案隔籬就寫住原因，錯咗即刻知錯喺邊。
4. 錯題再做：隔兩日開「錯題簿」重做一次。
5. 最後先做 paper：10 個單元做完，先用歷屆卷分課題練，最後 3–4 星期先計時做整份（優先做 2025 年新課程卷）。

分數喺邊度？

• MCQ：亂估平均都有 10 題。學熟呢 10 個單元，目標係 22 題以上。
• 乙部：唔好留白。好多分係常識同固定句式，例如寫出 =IF( , , ) 嘅結構都有 1 分。
• SBA：跟老師指引交齊，係最穩陣嘅分。
• 卷二：數據庫、網絡應用程式開發、算法與程式編寫，三揀二。要睇學校教邊兩科，呢份題庫未包括。

學生自覺性低，點算？

• 每次只做半個單元（約 10 分鐘），定死時間，例如晚飯後。
• 規定佢每次做完撳「WhatsApp 傳畀老師」，成績會自動填好。冇收到訊息 = 冇做，你就即刻問佢。
• 大人每日問一句：「今日錯咗邊題？點解？」叫佢講返個原因，講得出先算真係明。
• 連續 7 日、每日 10 分鐘，好過一個星期日坐 2 個鐘。
• 獎勵完成，唔獎勵分數：做完一個單元就算贏。

8 星期計劃

每個單元：第 1 日讀「一分鐘明白」＋做頭一半；第 2 日做後一半；第 3 日重做錯題。

答題守則

1. 唔好留白：寫錯唔會倒扣分。
2. 「舉出兩個」就寫兩點，最有把握嗰兩點擺前面，每點一句。
3. 「解釋」、「描述」用「因為…所以…」：講做咗咩，再講帶嚟咩結果。
4. 寫具體：唔好淨係寫「方便」、「快啲」，要講邊方面方便、比咩快。
5. 計數題寫步驟：答案錯咗都可能有步驟分。

常考題目，可以照寫